Senin, 20 Maret 2017

Korupsi demi Kehormatan

Korupsi demi Kehormatan
Seno Gumira Ajidarma  ;   Panajournal.com
                                                        KOMPAS, 19 Maret 2017

                                                                                                                                                           
                                                                                                                                                           

Itu malem, sembari melototin tivi di warung Mang Ayat, Sukab terbengong-bengong denger angka korupsi nyang tinggi, apalagi jumlah pelaku ame care nglakuinnye, nyang bergotong royong bagi-bagi rezeki seia sekata ringan sama dijinjing, tapi beratnye rame-rame ditinggalin-ape itu ngembaliin duit, atawa ngebantah binti ngeles.

Suasana meriah di warung, semua keliatan batang idungnye. Jali tukang ojek nyang terdesak ojek on-line, Bahlul tukang obat, Hasan buruh bangunan, Dul Kompreng kernet mikrolet, Mamik penjaja kopi saset,ame Rohayah nyang ude naik derajat jadikepale bersi-bersi kantor kementerian. Malah Vincent, "dosen kismin" nyang namenye suse diucapin, mangkenya dipanggil Abang Dosen, keliatan juga mojok sambil ngemil ampyang dari Jawa.

"Ane bilang sih koruptor ntu sama ajemaling, pancalongok," Sukab nerocosmeski mulutnye mingsih penu ame nasi gila, "kenape mesti dibeda-bedain nyebutnye ye? Sebut aje maling, ntar kan malu kalo mau nilep."

"Masalahnya Kab, korupsi ntu meski kite tau same-same nyuri, nyang nglakuin kayaknya kagak ngerasa," kata Dul Kompreng.

"Kagak ngerasa?"

"Kagak ngerasa nyuri mangsudnye," Hasan nimbrung.

"Kagak ngerasa nyuri? Olo-olo.."

"Iye dong, korupsi itu kan nglakuinnya enggak kayak maling jemuran
nyamber seprei.." Jali enggak mau kalah.

"Gimana dong? Bawa karung ngangkut bundelan-bundelan duit?"

"Oalah Kab, Kab, semingkin banyak orang kayak ente, seming-kin merajalela para jawara tilep." Rohayah geleng-geleng kepale kayak boneka dari India, "Korupsi itu Kab, cara-caranya enggak membuat orang mesti ngerasa jadi maling."

"Nape?"

"Soalnye kayak cara orang nyari duit ari-ari aje."

"Pegimane tuh? Aye jadi bingung ni Roh!"

"Duit-duit kagak halal itu dikasih name."

"Kayak orok dong!"

"He-he! Bise aje ente Kab, yo-i, kayak orok, tapi oroknye ude bangkotan sekarang." Jali nyela' sembari nenggak air kelapa.

"Namanya apaan?"
Hasan nyang nyaut.

"Ente ude biase denger Kab. Ntu uang rokok, uang pelicin, uang komitmen, uang denger, uang tanggung jawab, uang hadir, uang tanda tangan, uang kegiatan, uang perantara, uang terima kasih, uang syukur, uang berobat, uangtau deh banyak banget, pokoknya ade aje nyang dibikin pake nama macem-macem angsal ade duitnye. Intinye, nyang die ude digaji mesti dibayar lagi!"

"Cape deh!"

"Yo-i, capek! Ngikutin jawara tilep mah kagak ade matinye!"

"Bunu aje nape emangnye?"

"Itu die! Korupsi di negeri kite bise bikin bayi mati kurang gizi, tapi kagak perne hukumannye mati!" Mang Ayat nyeletuk, nyang tadi keliatannye ude setenge ngantuk.

"Pantes berani korupsi! Padahal copet aje dibakar massa!"

"Itu die Kab, kayak orang dagang, diitung untung ruginye! Kalau ketangkep doi tinggal bilang didolimin!" ujar Dul Kompreng.

"Busyet! Ngebalikin dunielahyauw!" Bahlul ngablag sekalian angop.

"Tapi ngomong-ngomong,kenape sih mesti korupsi? Manusia-manusia ini bukannye kalau enggak korupsi juga enggak bakalan mati kelaparan kan?"

Jalanan kayak ngedadak aje sepi, tapi suare mobil melaju ngedengung-dengung di jalan tol.

"Kehormatan, kehormatan.," kate Abang Dosen dari pojokan, "itulah yang mereka cari."

"Nyari kehormatan kok korupsi, mane bole Bang?"

"Begitu pentingnya kehormatan itu, begitu besar maknanya, sampai korupsi pun, yang mereka ingkari kebersalahannya, mereka tempuh untuk mendapatkannya."

"Kehormatan nyang pegimane ntu Bang, ampe perlu-perlunye nglakuin korupsi?"

"Pastilah kehormatan duniawi, Kab, power and glory.."

Tidak ada komentar:

Posting Komentar